Ռեմի Փանոսյանի եռյակը Երևանում

Այսօր՝ փետրվարի 27-ին, Առնո Բաբաջանյանի անվան Հայֆիլհարմոնիայի փոքր դահլիճում տեղի կունենա ֆրանսիացի դաշնակահար Ռեմի Փանոսյանի եռյակի համերգը։

Երեկ տեղի ունեցավ մամուլի ասուլիս, որին ներկա էին ֆիլհարմոնիայի փոքր դահլիճի տնօրեն Արտեմ Նաղդյանը, Ջազի հայկական ասոցիացիայի նախագահ Կամո Մովսիսյանը, Հայաստանում Ֆրանսիայի արտակարգ և լիազոր դեսպան Անն Լույոն և երաժիշտներ՝ դաշնակահար Ռեմի Փանոսյանը, բաս կիթառահար Մաքսիմ Դելպորտը և թմբկահար Ֆրեդ Պետիպրե.

Դեսպանը ներկայացրեց եռյակին, իրենց երաժշտությունը, որին նա շատ լավ ծանոթ է, ինչպես նաև Ֆրանկոֆոնիայի ծրագրի շրջանակներում դեսպանատան հետագա գործողությունները։ Ասուլիսի մյուս մասնակիցները նույնպես խոսեցին իրենց կազմակերպությունների ծրագրերի մասին։ Դե, երաժիշտները խոսեցին իրենց աշխատանքի, միջազգային ջազային ասպարեզում ունեցած հաջողությունների և Երևանում կայանալիք համերգի մասին։ Այնուհետև նրանք պատասխանեցին լրագրողների բազմաթիվ հարցերին, որոնց մեծ մասը վերաբերում էր հայ ջազի սիրահարների հետ հանդիպումից ունեցած ակնկալիքներին, հայկական խոհանոցի և տեսարժան վայրերի մասին ունեցած տպավորություններին։

Երեկոյան MEZZO ակումբում ելույթ ունեցավ Ռեմի Փանոսյանի և Վահագն Հայրապետյանի եռյակները (Վահագն Հայրապետյան՝ դաշնամուր, Արտեմ Մանուկյան՝ թավջութակ, Արման Մնացականյան՝ հարվածային գործիքներ), որն ավարտվեց մեծ ջեմով։

Այսօր Հայաստանի ֆիլհարմոնիայի փոքր դահլիճում տեղի կունենա եռյակի համերգը։

Համերգի սկիզբը՝ 19:00-ին